ភ្នំពេញ៖ តំណាងរាស្រ្តមណ្ឌលកំពង់ស្ពឺ លោក ហ៊ុន ម៉ានី បានអំពាវនាវឱ្យប្រជាពលរដ្ឋទាំងអស់ ចាប់ពីថ្ងៃនេះទៅត្រូវប្រុងប្រយ័ត្នចំពោះចេតនា ឬអំពើញុះញង់ក្នុងគោលបំណងបំផុសឲ្យមានការគូសបំផ្លាញសន្លឹកឆ្នោត។

លោក ហ៊ុន ម៉ានី ថ្លែងដូចនេះ ក្នុងពិធីសំណេះសំណាលជាមួយសមាជិក សមាជិកា គណបក្សប្រជាជនកម្ពុជា នៃក្នុងស្រុកថ្ពង ខេត្តកំពង់ស្ពឺ នៅថ្ងៃទី១៣ ខែកក្កដា ឆ្នាំ២០២៣។

លោកថា៖ «ចាប់ពីថ្ងៃនេះ រហូតដល់ថ្ងៃបោះឆ្នោត សូមលោកតា លោកយាយ អ៊ំ ពូ មា មីង បងប្អូន មានការប្រុងប្រយ័ត្នចំពោះសកម្មភាពមួយចំនួនដែលមានចេតនាមិនល្អ ដែលរួមមានអំពើបំភ្លៃព័ត៌មាន បន្លំដោយចេតនា ឬអំពើញុះញង់ក្នុងគោលបំណងបំផុសឲ្យមានការគូសបំផ្លាញសន្លឹកឆ្នោត»។

លោកបានបញ្ជាក់ឱ្យដឹងទៀតថា ក្នុងករណីដែលមានសកម្មភាពបែបនេះកើតឡើង សូមប្រជាពលរដ្ឋ ផ្តល់ដំណឹងដល់សមាជិក សមាជិកា ឬគណៈកម្មាធិការគណបក្សប្រជាជនកម្ពុជាក្នុងមូលដ្ឋាន ដើម្បីធ្វើចំណាត់ការតាមផ្លូវច្បាប់ ជៀសវាងកុំអោយទង្វើអគតិទាំងនេះកើតមានជាបន្តទៀត។

គួរឱ្យដឹងដែរថា កម្ពុជាបានកំណត់រៀបចំដំណើរការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ ដោយមានគណបក្សចំនួន ១៨ចូលរួម៕